الكون موحش والمسا فاقد احساس
والهـم ينسـج مــن خيـالـي قصـيـده
اكتب همومي بالقلـم قـوق قرطـاس
وارسـم معـانـاة الـجـروح الجـديـده
القلب وش خـلاه مخنـوق الانفـاس
بين الضلـوع العـوج ينـزف وريـده
الا الفـراق وغربـة الـنـاس للـنـاس
وبعـض السوالـف والعلـوم المكيـده
ياقـلـب لاتـحـزن ولايغـلـبـك يـــاس
ارتــاح واستبـشـر بلحـظـه سعـيـده
اقـولـهـا يـاقـلـب لابـــاس لابــــاس
لاتقـهـرك ســود اللـيـالـي العـنـيـده
اللي ذكر طيبي على العين والـراس
والـلـي تجاهلـنـي تجاهـلـت سـيــده
ماهمنـي مـن باعنـي دون مقـيـاس
عـزيـت نـفـسـي والامـانــي بـعـيـده
انـا كـذا طبعـي مــع كــل الأجـنـاس
الـقـلـب عـزيـتـه وشــديــت قــيــده
حوله من الاضـلاع حطيـت حـراس
تحميـه مـن غـدر الليالـي الشـديـده
اللي يذوق الغدر صافي من الكـاس
لابــــد يـتـعـلــم وعـلــمــه يـفــيــده
ضويت لي في سـود الايـام نبـراس
يـهـدي حيـاتـي لـلـدروب الـرشـيـده
موحش فكري عن تفاكيـر الادنـاس
نفسـي عـن الهفـوات دايــم زهـيـده
واللي يحاول يسرق اللول والمـاس
ماطالـتـه عـيـنـه ولا طـالــت أيـــده
يبطـي ويشهـر للبشـر ذل الافــلاس
لا بــدد امـوالــه بيـفـلـس رصـيــده
ماكـل صيـد يجيـبـه الـحـر قـرنـاس
يـمـوت بالرمـضـا ولا هــو يصـيـده
واللي يحاول يكسر الراس بالفـاس
مـثـل الــذي بـيــده يـكـسـر حـديــده
كتبتهـا جمـلـه انــا بـيـن الاقــواس
(لاتقـرب النـيـران جسـمـك تبـيـده)
اعـوذ بالرحـمـن مــن كــل خـنـاس
مــن الـوسـاوس والحـيـاة البـلـيـده
ياوجـد حالـي كـل مـاهـب نسـنـاس
سـافــرت بـافـكـاري لـدنـيـا بـعـيـده
اتذكر اللي غـاب مـن خيـرة النـاس
اللـي وصـوفـه فــي خيـالـي فـريـده
محشوم وافي طيب العرق والساس
بيـن البشـر مافـيـه شـخـص نـديـده
نسله من الاحـرار والعـرق دسـاس
رحــل عــن الدنـيـا بسـاعـه نكـيـده
الله يكسـي جسـمـه الـغـض بلـبـاس
من سنـدس الفـردوس حلـه جديـده
بصبر علـى فرقـاه والقلـب حسـاس
حيـاتـنـا مـاجــت عــلــى مـانـريــده
هذي النهايه تنكتـب فـوق قرطـاس
ارسلتـهـا عـبــر الاثـيــر القـصـيـده
مما راق لي..
__________________
